டொரண்டோ மாநகராட்சித் தேர்தலில் நேரடியாகப் போட்டியிடும் வேட்பாளர்களைக் காட்டிலும், அவர்களுக்குப் பின்னால் இருந்து செயல்படும் மறைமுக அரசியல் அமைப்புகளே தேர்தலின் முடிவுகளைத் தீர்மானிப்பதாக மூத்த பத்திரிகையாளர் மால்கம் ஜான்ஸ்டன் கவலை தெரிவித்துள்ளார்.

பாரம்பரியமாக டொரண்டோ மாநகராட்சி அரசியலானது எந்தக் கட்சியையும் சாராத, சுயாதீனமான முறையில் இயங்கி வந்தது. ஆனால், அமெரிக்க பாணியிலான அரசியல் களம் இப்போது டொரண்டோவிலும் உருவெடுத்துள்ளது குறித்து அவர் வெளியிட்டுள்ள கட்டுரையில் குறிப்பிடப்பட்டுள்ள முக்கிய அம்சங்கள்:

புரோகிரெஸ் டொரண்டோ : 2018-இல் தொடங்கப்பட்ட இந்த இடதுசாரி ஆதரவு அமைப்பு, வேட்பாளர்களைத் தேர்வு செய்து அவர்களுக்கு வாக்காளர்களைத் திரட்டித் தருவதில் பெரும் வெற்றி பெற்றது. 2023-இல் ஒலிவியா சௌ மேயராக வெற்றி பெறவும் இந்த அமைப்பின் களப்பணி முக்கியக் காரணியாக அமைந்தது.

வலதுசாரி எதிர்ப்பலை: புரோகிரெஸ் அமைப்பின் உத்தியைப் பின்பற்றி, தற்போதைய மேயர் ஒலிவியா சௌவை வீழ்த்த ‘ஏ பெட்டர் சிட்டி’மற்றும் ‘இன்டெக்ரிட்டி டிஓ’ போன்ற வலதுசாரி சார்பு அமைப்புகள் உருவாக்கப்பட்டு, தேர்தல் விளம்பரப் பரப்புரைகள் தீவிரப்படுத்தப்பட்டுள்ளன.

மக்களாட்சித் தத்துவத்தின்படி மக்கள் பிரதிநிதிகள் தொகுதிகளுக்கு மட்டுமே பொறுப்பானவர்களாக இருக்க வேண்டும். ஆனால், இத்தகைய மறைமுக அதிகார அமைப்புகளின் வருகை, மாநகராட்சி அரசியலின் தூய்மையையும் வெளிப்படைத்தன்மையையும் கேள்விக்குறியாக்கியுள்ளதாக அவர் சுட்டிக்காட்டியுள்ளார்.