கனடா வருவாய் முகமையகம் (CRA) மற்றும் கொரோனா பெருந்தொற்று கால அவசரகால நிவாரணக் கொடுப்பனவு (CERB) திட்டத்தை இலக்கு வைத்து நடத்தப்பட்ட பாரியளவிலான சைபர் மோசடி விசாரணை ஒன்றினை அடுத்து, ஒட்டாவா, கத்தினோ (Gatineau) மற்றும் மொன்றியல் ஆகிய நகரங்களைச் சேர்ந்த எட்டு பேருக்கு எதிராகக் குற்றச்சாட்டுகள் சுமத்தப்பட்டுள்ளதாக ராயல் கனடியன் மவுண்டெட் பொலிஸார் (RCMP) தெரிவித்துள்ளனர்.
கொரோனா பெருந்தொற்றுக்கால நிதியுதவிகள் வழங்கப்பட்ட போது, கனடா வருவாய் முகமையகத்தின் (CRA) இணையக் கணக்குகள் சைபர் தாக்குதலுக்கு உள்ளானதை அடுத்து, கடந்த 2020 ஆம் ஆண்டு ஓகஸ்ட் மாதத்தில் இந்த விசாரணை ஆரம்பிக்கப்பட்டதாக பொலிஸார் குறிப்பிட்டுள்ளனர்.
சந்தேகநபர்கள் திருடப்பட்ட தனிநபர்களின் அடையாளங்கள் மற்றும் மாற்றியமைக்கப்பட்ட வங்கி விபரங்களைப் பயன்படுத்தி, கனடா வருவாய் முகமையகத்தின் இணையக் கணக்குகளைத் தங்களின் கட்டுப்பாட்டிற்குள் கொண்டுவந்ததுடன், அதனூடாக வழங்கப்பட்ட ‘CERB’ நிவாரணக் கொடுப்பனவுகளைத் தங்களின் கட்டுப்பாட்டில் இருந்த போலி வங்கிக் கணக்குகளுக்கு சட்டவிரோதமாக திசைதிருப்பியுள்ளனர் என விசாரணையாளர்கள் குற்றம் சாட்டியுள்ளனர்.
இதன் மூலம் கனேடிய அரசாங்கத்திடமிருந்து தோராயமாக 364,000 டொலர்கள் மோசடி செய்யப்பட்டுள்ளதாக அதிகாரிகள் தெரிவித்துள்ளனர்.
குற்றச்சாட்டுகளுக்கு முகங்கொடுத்துள்ளவர்கள்:
-
மொறி இஸ்மாயில் துரே (Mory Ismael Toure – 36 வயது, கத்தினோ)
-
குவாகோ ஆஞ்ச் பற்றிக் எலியம்ஸ் குவாசி (Kouakou Ange Patrick Elliams Kouassi – 31 வயது, கத்தினோ)
-
லூயிஸ் ஹென்றி டகோரி-டேப்லி (Louis Henri Dacoury-Tabley – 29 வயது, மொன்றியல்)
-
ஜோஸ்பின் பெரோல் முகாங்-தியோன்ஜொக் (Jospin Berol Mougang-Tionjock – 28 வயது, மொன்றியல்)
-
ஹுஸாம் பென்னௌனா (Houssame Bennouna – 26 வயது, மொன்றியல்)
-
லகாட் போல் ஆண்ட்ரே புவாப்ரே (Lagaud Paul Andre Bouabre – 26 வயது, கத்தினோ)
-
டேவிட் ரிச்சர்ட் த்ரான் (David Richard Thran – 25 வயது, ஒட்டாவா)
-
போல் ஹரி ஜெய்ம் (Paul Harry Jayme – 39 வயது, மொன்றியல்)
கைது செய்யப்பட்டுள்ள எட்டு பேரும் 5,000 டொலர்களுக்கும் அதிகமான நிதி மோசடிக் குற்றச்சாட்டுகளுக்கு முகங்கொடுத்துள்ளதுடன், அவர்களில் சிலர் குற்றச் செயல்களைப் புரியும் நோக்கில் பிறரது தனிநபர் அடையாள விபரங்களை கைவசம் வைத்திருந்தமை தொடர்பான குற்றச்சாட்டுகளையும் எதிர்கொண்டுள்ளனர்.
அரசாங்கத்தின் பெருந்தொற்றுக்கால அவசர நிதியுதவித் திட்டங்களைத் தங்களுக்குச் சாதகமாகப் பயன்படுத்திக் கொள்வதற்காக, பல நபர்கள் ஒன்றிணைந்து திட்டமிட்ட வகையில் முன்னெடுத்த ஒரு “மிகவும் அதிநவீன மோசடித் திட்டம்” (Sophisticated fraud scheme) இதுவென பொலிஸார் விவரித்துள்ளனர்.
