அநுராதபுரம் ருவன்வெலி மகா சாயாவிற்கு அருகில் நீதிமன்ற உத்தரவுகளை மீறி சாகும்வரையிலான உண்ணாவிரதப் போராட்டத்தில் ஈடுபட்டிருந்தபோது, அங்கு ஏற்பட்ட வன்முறை மோதலைத் தொடர்ந்து பொலிஸாரால் கைது செய்யப்பட்ட பலாங்கொட கஸ்ஸபதேரர் உட்பட உட்பட ஏழு பேரையும் எதிர்வரும் நவம்பர் 26ஆம் திகதி வரை விளக்கமறியலில் வைக்குமாறு அநுராதபுரம் நீதவான் நீதிமன்றம் உத்தரவிட்டுள்ளது.

குறித்த சந்தேகநபர்களை மனநலப் பரிசோதனைக்கு உட்படுத்துமாறும், அவர்கள் போதைப்பொருள் பயன்படுத்தியுள்ளார்களா என்பதை உறுதிப்படுத்துவதற்காக மருத்துவப் பரிசோதனைக்கு உட்படுத்துமாறும் அநுராதபுரம் நீதவான் விசேட உத்தரவொன்றைப் பிறப்பித்துள்ளார். கைது செய்யப்பட்டவர்களில் பலாங்கொட கஸ்ஸபவிற்கு மேலதிகமாக மேலும் மூன்று பௌத்த பிக்குகளும் உள்ளடங்குவதாக பொலிஸார் நீதிமன்றத்தில் அறிக்கை சமர்ப்பித்தனர்.

நேற்று (12) ருவன்வெலி சாயா வளாகத்தில் இடம்பெற்ற தொடர்ச்சியான பதற்றமான மற்றும் அமைதியற்ற சம்பவங்களைத் தொடர்ந்தே இக்குழுவினர் கைது செய்யப்பட்டனர். பலாங்கொட கஸ்ஸபதேரர் உட்பட அவரது குழுவினரும் அவ்விடத்தில் உண்ணாவிரதப் போராட்டத்தில் ஈடுபட்டிருந்தபோது, ராஜாங்கனயவின் சத்தாரத்ன தேரர் தலைமையிலான குழுவொன்று அங்கு வருகை தந்ததையடுத்து இரு தரப்பினருக்கும் இடையில் கடுமையான வாக்குவாதம் ஏற்பட்டது. இந்த அமைதியின்மை தீவிரமடைந்த நிலையில், உண்ணாவிரதப் போராட்ட இடத்திலிருந்த கஸ்ஸப மற்றும் அவரது குழுவினரால் நடத்தப்பட்ட தாக்குதலில் ராஜாங்கனயவின் சத்தாரத்ன தேரர் தலையில் காயமடைந்து அதிக இரத்தப்போக்குக்கு உள்ளானார். அதனைத் தொடர்ந்து, புனித வளாகத்திற்குள் கலகம் விளைவிக்கும் வகையில் நடந்து கொண்ட கஸ்ஸப,தேரர் உட்பட ஏனைய நான்கு பிக்குகள் மற்றும் குழுவினர் பொலிஸாரால் கைது செய்யப்பட்டனர்.

இச்சம்பவத்திற்கு முதல் நாளான (11) கூட, சட்டத்தின் பார்வையில் பலாங்கொட கஸ்ஸபதேரர் உட்பட தேடப்படும் நபராக இருந்தார். திருகோணமலை கடற்கரையோரத்தில் மேற்கொள்ளப்பட்டதாகக் கூறப்படும் அனுமதியற்ற கட்டுமானங்கள் மற்றும் சர்ச்சைக்குரிய புத்தர் சிலை விவகாரம் தொடர்பான வழக்கு திருகோணமலை நீதவான் நீதிமன்றத்தில் விசாரணைக்கு எடுத்துக்கொள்ளப்பட்டபோது, அவர் நீதிமன்றத்திற்குச் சமூகமளிக்காமல் தலைமறைவாகியிருந்தமையே இதற்குக் காரணமாகும். அவர் நீதிமன்றத்தில் ஆஜராகத் தவறியமையால், அன்றைய தினம் நீதவான் நீதிமன்றத்தினால் அவரைக் கைது செய்வதற்கான பிடியாணை பிறப்பிக்கப்பட்டிருந்தது.

இத்தகைய பின்னணியில், நேற்று ருவன்வெலி சாயாவிற்கு அருகிலுள்ள உண்ணாவிரதப் போராட்ட இடத்தில் தங்கியிருந்தபோது, நீதித்துறையைக் கடுமையாக அவமதிக்கும் வகையில் அவர் பல கருத்துக்களை வெளியிட்டிருந்தமை குறிப்பிடத்தக்கது.

திருகோணமலை புத்தர் சிலை விவகாரம் தொடர்பான சட்ட நடவடிக்கைகளின் போது, திருகோணமலை நீதவான் எம்.எஸ்.எம். சம்சுதீனுக்கு சட்டம் தெரியாது என்பது தெளிவாகத் தெரிந்ததாக அவர் அங்கு பகிரங்கமாகத் தெரிவித்திருந்தார். மேலும், தனது வழக்கை விசாரிப்பதற்கு குறித்த நீதவான் நீதிமன்றத்திற்கு அதிகாரம் இல்லை என்றும், அதற்காக அரசியலமைப்பின் 105/4 சரத்தின் கீழ் தனியான நீதிமன்றமொன்று நிறுவப்பட வேண்டும் என்றும் அவர் கூறியிருந்தார்.

இதற்கு மேலதிகமாக, பிரதம நீதியரசர் பிரீதி பத்மன் சூரசேனவிற்கு சட்டம் தெரியாது என்றும், தாமே அவருக்குச் சட்டம் கற்றுக்கொடுத்ததாகவும் அவர் தெரிவித்திருந்தார். அத்துடன், பிரதமர் ஹரிணி அமரசூரிய இந்திய உளவுத்துறையின் உறுப்பினர் என்றும் அவர் குறிப்பிட்டிருந்தார். ஜனாதிபதி அனுர குமார திசாநாயக்கவிற்கும் அவப்பெயர் ஏற்படுத்தும் வகையிலும், சவால் விடும் வகையிலும் இவர் தினமும் பல்வேறு கருத்துக்களை வெளியிட்டு வந்தார். நாட்டின் முக்கிய பிரமுகர்களை இலக்கு வைத்து, பித்தலாட்டமான முறையில் பொருத்தமற்ற கருத்துக்களை இவர் பரப்பியதாலும், தேவையற்ற மத மற்றும் இனவாத அமைதியின்மையை உருவாக்கும் வகையில் எதிர்க்கட்சிக்கு விசுவாசமான சமூக ஊடகங்களும் தனியார் தொலைக்காட்சி அலைவரிசைகளும் அவற்றை முன்னிலைப்படுத்திப் பயன்படுத்தியதாலும், இவர் கூறிய விடயங்கள் நாட்டில் எளிதில் முக்கிய தலைப்புச் செய்திகளாக மாறின.

குறிப்பாக, நீதிமன்ற உத்தரவுகளைப் புறக்கணித்து, தான் தேவநம்பியதிஸ்ஸ மன்னனின் சட்டத்திற்கு மட்டுமே கட்டுப்படுவதாகக் கூறி அநுராதபுரம் வளாகத்தை விட்டு வெளியேறாமல் இருந்ததன் மூலம், சட்டத்தின் மீதான நம்பிக்கையைச் சீர்குலைக்கும் வகையிலும் மோசமான முன்னுதாரணத்தை ஏற்படுத்தும் வகையிலும் இவர் செயற்பட்டார்.

நீதிமன்றத்தைத் தவிர்த்து பிடியாணை பிறப்பிக்கப்பட்ட நிலையிலும், நீதிமன்றத்தை பகிரங்கமாக அவமதித்து, அதனைத் தொடர்ந்து புனிதத் தலத்திற்குள் வன்முறை மோதல்களில் ஈடுபட்டதன் மூலமும் சட்டத்தின் பிடியில் சிக்கியுள்ள இக்குழுவினர், எதிர்வரும் 26ஆம் திகதி வரை விளக்கமறியலில் இருக்க வேண்டியதுடன், நீதிமன்றத்தினால் உத்தரவிடப்பட்டுள்ள மனநல மற்றும் போதைப்பொருள் மருத்துவப் பரிசோதனை அறிக்கைகளையும் எதிர்கொள்ள வேண்டியுள்ளது.