மேற்காசிய போரை நிறுத்த அமெரிக்காவுக்கு 7 நிபந்தனைகளை ஈரான் விதித்துள்ளது. இந்த நிபந்தனைகளை நிராகரித்தால் போருக்கு தயாராக உள்ளோம் என்றும் ஈரான் எச்சரிக்கை விடுத்திருக்கிறது.
கடந்த பிப்ரவரி 28-ம் தேதி ஈரான் மீது அமெரிக்க ராணுவம் தாக்குதலை தொடங்கியது. சுமார் 7 மாதங்களாக இருதரப்பு இடையே போர் நீடித்து வருகிறது. ஈரானின் ராணுவ தளங்கள், ஆயுதக் கிடங்குகளை குறிவைத்து அமெரிக்க ராணுவம் தாக்குதல் நடத்தி வருகிறது. இதற்கு பதிலடியாக சவுதி அரேபியா, ஐக்கிய அரபு அமீரகம் உள்ளிட்ட நாடுகளில் உள்ள அமெரிக்க ராணுவ தளங்கள் மீது ஈரான் ராணுவம் தாக்குதல் நடத்தி வருகிறது.
போரை நிறுத்த அமெரிக்கா, ஈரான் இடையே கத்தார் அரசு சமரச முயற்சிகளில் ஈடுபட்டு வருகிறது. இதுகுறித்து ஈரானின் தேசிய பாதுகாப்பு கவுன்சில் செயலாளர் மொஹ்சென் ரெஸாயீ நேற்று கூறியதாவது: போரை நிறுத்த அமெரிக்காவுக்கு 7 நிபந்தனைகளை விதித்துள்ளோம். கத்தார் வாயிலாக இந்த நிபந்தனைகளை அமெரிக்காவிடம் அளித்திருக்கிறோம். ஈரானுக்கு எதிரான தாக்குதல்களை நிறுத்த வேண்டும்.
முடக்கப்பட்ட ஈரானின் நிதி ஆதாரங்களை விடுவிக்க வேண்டும். ஈரான் துறைமுகங்களை குறிவைத்து கப்பல் போக்குவரத்து முடக்கப்பட்டு இருக்கிறது. எங்களது கப்பல்களின் சுதந்திரமான கடல்வழி போக்குவரத்தை உறுதிசெய்ய வேண்டும். இவை உள்ளிட்ட 7 நிபந்தனைகளை விதித்திருக்கிறோம். அமெரிக்காவின் பதிலுக்காக காத்திருக்கிறோம். எங்களது நிபந்தனைகளை நிராகரித்தால் போருக்கு தயார் நிலையில் உள்ளோம். இவ்வாறு மொஹ்சென் ரெஸாயீ தெரிவித்துள்ளார்.
