கச்சத்தீவு மற்றும் இந்திய மீனவர்களின் அத்துமீறிய நடவடிக்கைகள் தொடர்பில் இந்திய நீதிமன்றம் வழங்கிய தீர்ப்புகளுக்கு நன்றி தெரிவித்துக்கொள்வதாக கடற்றொழில் நீரியல் வள அமைச்சர் இராமலிங்கம் சந்திரசேகர் தெரிவித்தார்.

பாராளுமன்றத்தில் வியாழக்கிழமை (8) நடைபெற்ற ஊழல் எதிர்ப்பு (திருத்தச்) சட்டமூலம் மீதான விவாதத்தில் கலந்துகொண்டு உரையாற்றுகையிலேயே இவ்வாறு தெரிவித்தார்.

அவர் அங்கு தொடர்ந்து உரையாற்றுகையில்,

கடந்த காலங்களில் தமிழ்நாட்டின் திராவிட முன்னேற்றக் கழகம் மற்றும் அண்ணா திராவிட முன்னேற்றக் கழகம் ஆகியவற்றைச் சேர்ந்த உறுப்பினர்கள் இருவர் கச்சத்தீவு கடற் பரப்பில் இந்திய மீனவர்கள் மீன்பிடிப்பதற்கான அனுமதி வழங்கப்பட வேண்டும் என நீதிமன்றத்தில் வழக்குத் தாக்கல் செய்திருந்தார்கள். அதனை நிராகரிக்கும் வகையிலேயே நீதிமன்றம் உத்தரவு பிறப்பித்துள்ளது.

கச்சத்தீவு மாத்திரமல்ல அந்த கடல் பரப்பு என்பது இலங்கைக்கும் சொந்தமானது அதில் எந்தவித மாற்றுக் கருத்துக்கும் இடமில்லை என நீதிமன்றத்தில் தீர்ப்பு வழங்கியுள்ள நீதிபதிகள் தெளிவாகக் குறிப்பிட்டுள்ளார்கள்.

அதற்காக நாம் நன்றிகளைத் தெரிவித்துக் கொள்கின்றோம்.

அது மாத்திரமல்ல. இழுவை மடி படகுகள் இலங்கை கடற்பரப்பிற்குள் அத்துமீது பிரவேசித்து மேற்கொள்ளும் நடவடிக்கைகளுக்கு எதிராகவும் அந்த நீதிபதிகள் விடயங்களை முன்வைத்துள்ளார்கள்.

இந்திய கடற்பரப்பு மிகவும் அசுத்தமாகவும் இலங்கை கடற்பரப்பு மிகவும் சுத்தமாகவும் காணப்படுகிறது. இந்திய கடற்பரப்பு அசுத்தமாக காணப்படுவதாலேயே அங்கு மீன்கள் மற்றும் கடல் வாழ் உயிரினங்கள் வாழ முடியாத நிலை காணப்படுகிறது. அதன் வெளிப்பாடாகவே தமிழ்நாட்டின் மீனவர்கள் அங்கு மீன் பிடிக்க முடியாத நிலை ஏற்பட்டு எமது கடற்படைப்பிற்குள் அத்துமீறி பிரவேசித்து மோசமான நடவடிக்கைகளில் ஈடுபடுகின்றார்கள். இந்திய கடற்பரப்பு அசுத்தமான பாலைவனமாக மாறிவிட்டது.

எனவே சுத்தமாக காணப்படும் இலங்கை கடற்பரப்பு மீது இந்திய மீனவர்கள் கைவைக்கக் கூடாது என்றும் இந்திய நீதிமன்றம் உத்தரவு பிறப்பித்துள்ளது என்றார்.